Вкупно десет пожари на отворен простор се регистрирани денеска до 13 часот. Според информациите од Центарот за управување со кризи (ЦУК), шест од нив се сè уште активни, еден е ставен под контрола, а три се целосно изгаснати.
Активни жаришта има во неколку региони во земјава, каде што се зафатени ниска вегетација, грмушки и шуми.
Во општина Прилеп се интервенира во атарот на село Чаниште, на кракот кон селата Крушевица, Лопатица и Дуње, како и кон Црна Река.
Пожар зафати мешана шума во општина Студеничани, на потегот меѓу селата Моране, Вртекица и Рамни Габер.
Во општина Македонски Брод огнот гори во месноста Видуш, кај селата Драгов Дол и Локвица, каде што се зафатени нискостеблеста шума и грмушки.
Во општина Кичево е зафатена високостеблеста букова шума во атарот на село Тајмиште, на месноста Дарда, додека во општина Липково гори ниска вегетација и шума кај село Никуштак.
Во општина Крушево повторно се активираше пожарот во реонот на село Белушино, додека во село Јакреново состојбата е ставена под контрола.
Под контрола е и пожарот на депонијата во Делчево. Изгаснати се пламените јазици кај село Форино (Гостивар), село Церово (Желино) и село Мусинци (Могила).