Во изминатото деноноќие во земјава се регистрирани вкупно 27 пожари на отворен простор, од кои девет се уште се активни, два се ставени под контрола, а 16 се целосно изгаснати, соопшти Центарот за управување со кризи (ЦУК).
Според податоците од ЦУК, активни пожари има во девет општини низ државата:
- Општина Студеничани: кај селата Моране, Вртекица и Рамни Габер;
- Општина Македонски Брод: кај месноста Видуш и селата Драгов Дол и Локвица;
- Општина Кичево: кај селото Тајмиште и месноста Дарда;
- Општина Липково: кај селото Никуштак;
- Општина Крушево: кај селата Белушино и Јакреново;
- Општина Врапчиште: кај селото Ломница;
- Општина Желино: кај селото Церово;
- Општина Тетово: кај селото Бродец;
- Општина Прилеп: кај селото Бонче.
Под контрола се ставени пожарите на депонијата во Делчево, како и пожарот кај прилепските села Чаниште, Крушевица, Лопатица и Дуње кон Црна Река.