Летото штотуку започна, а Европа и регионот веќе се погодени од првиот, исклучително опасен топлотен бран.
Додека во делови од Стариот континент се рушат температурни рекорди за јуни, метеоролозите предупредуваат дека екстремните горештини, проследени со опасни „тропски ноќи“, пристигнуваат и на Балканот.
Франција: На сила е црвено предупредување за 39 милиони луѓе. Од викендот досега најмалку 19 лица ги загубиле животите, меѓу кои и две мали деца (на возраст од две и четири години) кои починале откако биле оставени во загреан автомобил. Во Париз се очекува да биде соборен јунискиот рекорд со 38,4 степени.
Обединето Кралство: Се очекуваат температури до околу 40 степени, со што би бил соборен рекордот од 1976 година. Издаден е црвен метео-аларм за шест региони во Англија.
Шпанија: Температурите се од пет до 10 степени над просекот. Во Сан Себастијан, на традиционално постудениот север, измерени се 40 степени – двојно повеќе од историскиот просек за овој период.
Италија: Издадено е црвено ниво на предупредување за 12 градови.
За денеска се најавени високи температури но и невреме во регионот и Македонија.
Во Србија се најавува променливо облачно и нестабилно време, со локални врнежи од дожд и грмежи.
Во текот на средината на денот и попладневните часови, врнежите на одредени места ќе бидат поинтензивни, со краткотрајна појава на град, со поголема веројатност во централниот, источниот и југоисточниот дел на Србија, наведува РХМЗ.
Поради влијанието на циклон кој се движи од подрачјето на Турција, денес низ Македонија се очекува променливо и нестабилно време. Во повеќе региони ќе има врнежи од дожд, проследени со грмежи и засилен ветер. На одредени места временските непогоди може да бидат поизразени, со интензивен пороен дожд, силни налети на ветер и услови за појава на град. Утринските температури ќе се движат од 11 до 19 степени, додека дневните ќе достигнат меѓу 28 и 36 степени.
Во главниот град претпладнето ќе преовладува сончево време со мала до умерена облачност. Подоцна во текот на денот се очекува развој на нестабилни облачни маси кои ќе донесат дожд и грмежи, а ќе дува и засилен северен ветер. Температурата во утринските часови ќе биде околу 17 степени, додека максималната дневна ќе достигне до 33 степени.