Вонреден метеоаларм е активиран на територијата на цела Србија поради силниот тропски бран кој започнува од утре, 26 јуни, а ќе трае сè до вторник, 2 јули 2026 година. Овој жежок бран веќе се движи и во правец на Македонија.
Тамошниот републички завод (РХМЗ) информира дека најавените температури ќе се приближат до 40-тиот степен, што со себе носи сериозен ризик по здравјето на луѓето и околината.
Според официјалните прогнози, веќе во петок температурата во регионот ќе достигне до 36 степени. Пикот на овој топлотен бран се очекува за време на викендот, кога термометрите на повеќето места ќе покажуваат меѓу 35 и 39 степени Целзиусови.
Паралелно со екстремните жештини, вклучен е црвен аларм за пожари поради драстично зголемениот ризик од нивно брзо ширење на отворен простор.
Како критични се посочуваат подрачјата каде има хроничен недостаток на врнежи и дефицит на влага во почвата. Поради тоа, упатен е апел до јавноста за максимална одговорност, со напомена дека и најмало невнимание во природа може да предизвика големи еколошки штети.
Лекарите излегоа со препорака граѓаните да се заштитат од директно сонце меѓу 10:00 и 17:00 часот, да консумираат доволно течности и да ги прилагодат своите активности на најавените африкански денови.