Црногорска државјанка, која била член на екипажот на крузерот „MV Hondius“ каде се појави хантавирус, моментално се наоѓа во изолација во Холандија. Таа е дел од групата евакуирани лица врз кои се спроведуваат засилени здравствени контроли.
Од Министерството за надворешни работи за Телевизија Вијести потврдија дека се во постојан контакт со својата државјанка. Таа синоќа пристигнала во Холандија со организиран превоз од Шпанија.
„Таа моментално е во карантин во хотел во Ајндховен, каде што е тестирана. Додека не се завршат пропишаните мерки, не ѝ е дозволено да го напушти сместувањето“, соопштуваат од Министерството.
На црногорската државјанка ѝ е понудена целосна конзуларна помош и поддршка. Засега нема официјални информации дали екипажот ќе биде репатриран во матичните земји или ќе биде вратен на бродот, каде е предвиден целосен карантин.