Црногорската полиција денеска им забрани влез во земјата на 90 луѓе кои со чартер-лет допатувале од Белград во Тиват, поради сомнеж за субверзивно дејствување пред утрешниот Самитот на Европската Унија.
Како што пренесува црногорскиот весник „Вијести“, меѓу патниците во авионот имало регистрирани „лица од интерес за безбедноста“ и сите тие со првиот лет ќе бидат вратени назад за Белград бидејќи одбиле да одговорат на прашањата на полицијата за целта на нивната посета.
Весникот посочува и дека дел од овие лица имаат криминално досие, а наводно имале задача неформално да го обезбедуваат престојот на српскиот претседател Александар Вучиќ на Самитот ЕУ – Западен Балкан.
Поради претстојниот висок политички собир, црногорските безбедносни служби спроведуваат обемни и засилени активности, во чиј контекст се вршат и строги контроли на граничниот премин на аеродромот во Тиват.
Чартер летот на линијата Белград-Тиват веднаш бил ставен под специјална контрола од страна на полициските единици.
„Авионот беше задржан на пистата на аеродромот во Тиват со цел да се спроведат детални проверки на лицата кои пристигнале или причините за нивната посета, земајќи ги предвид зголемените безбедносни мерки пред самитот ЕУ – Западен Балкан. Јавноста ќе биде навремено информирана за преземените понатамошни активности“, наведе црногорската полиција.
Претходно, локалните медиуми објавија дека црногорските власти мобилизирале повеќе од 1.500 полицајци од сите единици, вклучително и тактичките, со цел целосно да го обезбедуваат Самитот ЕУ – Западен Балкан во Тиват.