Празникот на жената помина во знакот на семејно насилство за повеќе семејства низ државата. Министерството за внатрешни работи бележи дури осум пријавени настани само во текот на осмомартовското деноноќие, при што од слобода се лишени шест лица во Скопје, Росоман, Кичево и виничко.
Најголемиот број инциденти се регистрирани во главниот град, каде мета биле претежно сопруги и поранешни партнерки. Во скопската населба Карпош, полицијата уапсила 48-годишен маж кој во семејниот дом физички ја нападнал својата сопруга и кршел дел од покуќнината. Во истата општина зад решетки завршил и 52-годишен скопјанец кој среде бракоразводна постапка им се заканувал на сопругата и на нивниот 17-годишен син, при што го скршил нејзиниот телефон.
Особено брутален напад е пријавен и во друго скопско семејство, каде 65-годишен маж ја нападнал својата 62-годишна сопруга удирајќи ја со тврд предмет. Црната низа во Скопје продолжува со пријава од 41-годишна жена која била претепана од нејзиниот поранешен партнер, како и пријава од 38-годишна жена која со денови добивала закани по живот од нејзиниот девер.
Полицискиот билтен бележи и сериозни инциденти во внатрешноста, каде главен катализатор на насилството бил алкохолот и нарушените меѓугенерациски односи. Во Виница е уапсен 58-годишен маж во состојба на тешко пијанство (измерени фрапантни 3,30 промили алкохол). Тој грубо ја прекршил судската забрана за приближување на 100 метри и со денови ја пресретнувал и ѝ се заканувал на својата 65-годишна поранешна партнерка.
Под дејство на алкохол (1,40 промили) бил и 69-годишен жител на Росоман кој им се заканувал на својот син и снаата, поради што бил задржан во полициска станица, а известен е и Центарот за социјални работи. Во Кичево, пак, регистриран е случај на насилство од дете кон родител – полицијата уапсила 37-годишник кој физички го нападнал сопствениот татко.
Од МВР информираат дека се преземаат мерки за расчистување на сите случаи, по што против сторителите ќе бидат поднесени соодветни пријави.