Со низа активности и свечености, денеска во Скопје се одбележува 7 Мај – Денот на македонската полиција. Централната прослава ќе се одржи во кругот на Министерството за внатрешни работи, каде што ќе биде оддадена почит на припадниците на службата.
На настанот е предвидено официјално обраќање на министерот за внатрешни работи, Панче Тошковски, како и на директорот на Бирото за јавна безбедност (БЈБ), Александар Јанев.
На свеченоста ќе присуствуваат членови на Владата, високи државни функционери, како и претставници на дипломатскиот кор во земјава.
Покрај официјалниот дел, МВР подготви и богата попладневна програма наменета за јавноста. Активностите продолжуваат во 17:30 часот на паркингот пред Градското собрание. Таму ќе биде презентирана опрема од различни полициски единици, а граѓаните ќе имаат ретка можност за директно дружење со полициските службеници.
Денот ќе заврши со музички хепенинг на „Школка“ во Градскиот парк, кој започнува во 18:00 часот, каде што се најавени настапи на познати музички ѕвезди.