Министерката за образование и наука, Весна Јаневска, денеска најави дека македонската јавност наскоро ќе биде сведок на уште еден случај на сериозни неправилности во институциите. Јаневска ова го порача коментирајќи го актуелниот проблем на Филозофскиот факултет при УКИМ, каде што со години незаконски биле запишувани студенти.
„Многу бргу ќе слушнеме уште една, многу покрупна неправилност од оваа, која ќе ја изненади целата македонска јавност. Има многу неправилности во одредени институции, не во сите, и за нив ќе се постапува по закон. Дали била виновна администрацијата или раководството, дали некои студенти учествувале во ваквите дејства, ќе утврдат соодветните органи“, изјави министерката при посетата на Стоматолошкиот факултет.
Станува збор за незаконско запишување на студенти на втор и трет циклус студии иако имале завршено тригодишни стручни, а не академски студии. Државниот просветен инспекторат веќе донел решение за поништување на уписите на седуммина на магистерски и четворица на докторски студии, на кои им е прекинато студирањето. Осуммина веќе имаат магистрирано, а нивниот статус останува нејасен.
Ректорката на УКИМ, Билјана Ангелова, пак, посочи дека проблемот е затекнат и се однесува на периодот меѓу 2019 и 2022 година.
„Оваа состојба е затекната за сите нас. Се случувало во периодот помеѓу 2019 и 2022 година во едно сосема друго опкружување и друго раководство. Останува да бидеме трпеливи и да го почекаме конечниот извештај на инспекцијата и да се постапи и тогаш ќе дадеме официјално известување за исходот од целата оваа состојба“, изјави Ангелова.
Министерката Јаневска најави дека од понеделник Министерството ќе донесе конечно решение по предметот, нагласувајќи дека законот мора да се почитува, иако изрази жалење за ситуацијата во која се нашле студентите.