Верувам дека постои чесност и дека со чесност можеме да изградиме Чаир со европски изглед, но со топла душа што ќе им служи на луѓето, што ќе им излезе во пресрет на нивните потреби, што ќе им го врати Чаир назад од рацете на една клика што го користеше како инструмент само за неколкумина.
Ова го истакна Бујар Османи, кандидатот за градоначалник, во својот говор вечерва одржан на голем собир во Чаир, нагласувајќи дека вистинската промена во општината започнува со чесност, ред и посветеност.
„Знам дека не очекувате големи зборови од мене, очекувате дела. Но, секое дело се темели на план, на визија, на верба“, рече Османи, потенцирајќи дека неговата најголема политичка и професионална вредност е чесноста и дека токму врз неа ќе се изгради новиот, достоинствен Чаир.
Османи додаде дека граѓаните заслужуваат општина со европски дух и човечко лице, која не им служи на партиски центри на моќ, туку на потребите на секој жител. Османи рече дека е уверен дека секој систем може да функционира ако има ред, посветеност и чесност.
„Ќе продолжам да верувам, дури и ако сум сам во тоа, сè додека таа верба не стане заедничка и не се претвори во колективно движење за подобар Чаир: европски, достоинствен, чесен и уреден“, нагласи Османи.