Симеон Михаилов, осуден во Македонија и баран за издржување затворска казна од 12 години и шест месеци, се појавил на бугарска телевизија каде зборувал за случајот со неговата ќерка Ива Михаилова од Кочани. Според објавените информации, потерницата по него и натаму е активна.
Михаилов бил дел од случајот „Детонатор“ и бил осуден за дела поврзани со обид за убиство, злосторничко здружување и насилство. Првично му била изречена доживотна казна затвор, која во понатамошната судска постапка била намалена.
Во текот на постапката тој ја напуштил Македонија, а во 2014 година бил екстрадиран од Италија, каде претходно бил уапсен по меѓународна потерница. Подоцна повторно станал недостапен за македонските органи.
Неговото појавување во бугарските медиуми е поврзано со судскиот процес против неговата ќерка Ива Михаилова, на која во Кочани ѝ се суди за сообраќајна несреќа со смртни последици. Таа на првото рочиште се изјаснила дека не е виновна.
Случајот со Михаилова во изминатиот период предизвика реакции и во Бугарија, а нејзиниот татко сега јавно зборува за нејзиниот третман во Македонија, иако македонските власти го бараат за издржување на правосилната затворска казна.