Бугарија побара меѓународна поддршка за истрагата за нападите со беспилотни летала врз три брода во Црното Море, во близина на нејзините територијални води. Премиерот Румен Радев ги оцени инцидентите како „апсолутно неприфатливи“, откако при еден од нападите брод потонал, а неговиот екипаж бил евакуиран.
Радев соопшти дека е свикан итен состанок на Советот за безбедност при бугарската влада. Според него, еден брод бил погоден на 17 наутички милји источно од Крапец и потонал, при што еден член на екипажот бил спасен. Претходно, во 1:30 часот по полноќ, бил примен повик за помош од брод лоциран 18 наутички милји источно од Бјала, кој според екипажот бил погоден од три воздушни дронови.
Спасувачките служби и граничната полиција ги евакуираа сите 15 членови на екипажот на малтешкиот брод „Челзи 3“, регистриран во Одеса и во украинска сопственост, кои се пренесени во Варна, а петмина добиле медицинска помош. Радев информираше дека постојаните претставници на земјата во НАТО и ЕУ се запознаени со настаните и најави разговор со генералниот секретар Марк Руте.
– Бугарија побара поддршка во истрагата за нападите врз три брода со цел со сигурност да се утврди од која земја потекнуваат беспилотните летала што ги погодуваат бродовите во непосредна близина на бугарските територијални води – изјави Радев, нагласувајќи дека Софија ќе бара помош за зајакнување на надзорот и реакцијата.
Иако нагласи дека засега нема цврсти докази за обвинување на која било страна, Радев посочи дека околностите одат во прилог на Руската Федерација и најави покана за разговор до руската амбасадорка Елеонора Митрофанова.
– Немаме цврсти и јасни докази за да покренеме обвиненија против која било од страните, но логиката, како што веќе наведов, укажува дека резултатот е во корист на Руската Федерација – рече Радев.