Пожарот што вчера попладне избувна на падините на планината Петрино над охридската населба „Бараки“ е локализиран и целосно изгаснат благодарение на брзата реакција на пожарникарите, како и на помошта од локалното население и доброволци.
Од Територијалната противпожарна единица Охрид информираат дека веднаш по пријавата на пожарот интервенирале со четири противпожарни возила и 17 пожарникари.
Огнот зафатил поголема површина со сува трева и деградирана борова шума, а поради силниот ветер постоела опасност пламените јазици да се приближат до околните објекти.
Со координирана акција на пожарникарите и граѓаните кои помогнале во гаснењето, спречено е понатамошно ширење на огнот и предизвикување поголема материјална штета.
Причините за избувнувањето на пожарот сè уште се утврдуваат, но првичните сознанија упатуваат на можен човечки фактор.
Од ТППЕ Охрид апелираат граѓаните да бидат внимателни и одговорни при активности на отворено, а надлежните институции да преземат мерки за откривање на причинителите на пожарите.