Жителите на улицата „Партение Зографски“ на Водно алармираат дека се копа и гради во непосредна близина на главната водоводна цевка, стравувајќи од сериозни оштетувања и прекини во водоснабдувањето, обвини денеска Клементина Брзаковска, член на ГК Скопје и претседател на Комисијата за животна средина на ОК Центар.
Брзаковска посочи дека и покрај повеќекратните пријави од граѓаните до Општина Центар, надлежните служби досега не излегле на терен.
„Господине Герасимовски, колку пријави треба да поднесат граѓаните за конечно да реагирате? Дали треба да настане штета, па потоа да преземете нешто? Јавно прашуваме: Дали е точно дека Општина Центар во моментов има еден градежен инспектор, кој е на боледување, додека останатите ја напуштиле работата? Дали причината за нивното заминување се евентуалните притисоци и од кого?“, изјави Брзаковска.
Таа упати јавен повик до првите луѓе на партијата и општината да го посетат местото и да им дадат одговори на жителите.
„Господине Филипче, господине Горан Бетон Герасимовски, ве повикуваме да дојдете на оваа локација, да разговарате со жителите и да објасните кој ја контролира изградбата и кој ја гарантира безбедноста на водоводната инфраструктура. Господине Филипче, ве повикуваме заедно со Горан Бетон Герасимовски симболично да ги вадиме тулите од овој објект, за кој жителите сметаат дека е спротивен на нивните интереси. Ветувавте хумана урбанизација, а денес граѓаните бараат одговори и конкретни дела“, порача Брзаковска.
Од ВМРО-ДПМНЕ бараат итен инспекциски надзор, детална проверка на водоводната инфраструктура и јавно објавување на сите наоди, со порака дека Центар мора да им припаѓа на граѓаните, а не на инвеститорските интереси.