Тешко убиство се случи денеска во селото Балдрен, во близина на албанскиот град Лежа, при што животот го загуби брачен пар. Според првичните информации, нападот бил извршен на класичен начин – „возило против возило“.
Додека сопружниците се движеле со своето „Ауди“, врз нив било пукано со автоматско оружје од друго возило кое било во движење. Напаѓачите веднаш по пукањето побегнале од местото на настанот. Возилото на жртвите е целосно изрешетано, а лекарите на самото место констатирале смрт на двете лица.
Полициските тимови веднаш излегоа на терен и го блокираа реонот, а во тек е интензивна потрага по сторителите.
Идентитетот на мажот е потврден – станува збор за Крешник Мујечи. Според албанските медиуми, Мујечи бил добро познат на органите на прогонот поради своето криминално досие. Тој претходно бил уапсен во 2017 година, како соучесник во убиство извршено во 2016 година, во кое бил вмешан и неговиот брат.
Овој викенд во Албанија е обележан со низа трагедии. Покрај вооружениот инцидент, земјата ја потресе и црн биланс на патиштата, каде во сообраќајни несреќи животот го загубија пет лица, а десетина други се здобија со повреди.