Министерката за енергетика, рударство и минерални суровини, Сања Божиновска, денеска во Солун ќе го потпише меморандумот за соработка со кој Македонија официјално се приклучува кон Вертикалниот гасен коридор. Настанот се одржува во рамки на 10. Форум за енергетика на Југоисточна Европа (SEEF).
Иницијативата има за цел диверзификација на снабдувањето со природен гас и зајакнување на енергетската стабилност во регионот на Југоисточна, Централна и Источна Европа.
Пред потпишувањето, предвидено е Божиновска да учествува на министерска тркалезна маса посветена на безбедноста, достапноста и конкурентноста во енергетскиот сектор, заедно со нејзините колеги од Грција, Бугарија и Кипар.
Форумот во Солун се фокусира на енергетската сигурност, обновливите извори и регионалната соработка. Покрај ова, министерката претходно учествува и на 6. Метрополитен самит, каде што се разгледуваат теми поврзани со регионалното поврзување, инфраструктурниот развој и зелената транзиција до 2030 година.
Одлуката за проширување на Вертикалниот коридор кон Македонија и Србија беше донесена во мај годинава на министерскиот состанок во Атина. Неодамна, претставниците на грчкиот оператор ДЕСФА и операторите од земјите учеснички ги допрецизираа деталите за проширувањето.
Со приклучувањето кон овој коридор, земјата треба да обезбеди дополнителна енергетска стабилност. Проектот се одвива паралелно со изградбата на гасните интерконектори со Грција и Србија.
Минатата недела беше потпишан Договорот за проектирање и изградба на интерконекторот со Србија, додека изградбата на оној со Грција е во тек и се очекува да заврши следната година. Со нивна финализација, Македонија ќе се поврзе на север и на југ со можност да прерасне во регионален центар за природен гас.