СДСМ побара од надлежните институции да го објават документот со кој се потврдува дека водата за пиење во Гостивар е безбедна.
На прес-конференција, Маја Борозан од СДСМ ја критикуваше Владата поради начинот на кој, како што рече, јавноста била информирана за состојбата со водата во Гостивар.
„Во Гостивар вчера видовме слика што ќе остане запаметена. Политичари и функционери држат здравица, пијат вода пред камери, велат „на здравје“ и дека е „многу вкусна“. А цел месец граѓаните пиеја вода загадена со фекалии. Цел град беше отруен, 5.000 луѓе беа заболени“, изјави Борозан.
Од СДСМ велат дека првично било најавено оти резултатите од анализите ќе бидат готови на 20 август, но сега, како што тврдат, надлежните соопштиле дека водата е безбедна шест дена порано.
„Како до вчера, 20 август, а денес нагло сè е во ред?“, праша Борозан.
Таа побара да биде објавен официјален документ со кој ќе се потврди исправноста на водата, како и податоци за тоа која институција ја извршила анализата и кој го потпишал извештајот.
„За здравјето на луѓето мора да има стручна анализа, документ, потпис и одговорност. Граѓаните не бараат здравица. Бараат чиста вода и гаранција дека е безбедна“, порача Борозан.
Од СДСМ обвинуваат и дека во изминатите пет недели граѓаните добивале различни и контрадикторни информации од надлежните институции и функционери.
Според Борозан, првично водата била прогласена за безбедна за употреба како техничка, по што било соопштено дека се присутни бактерии. Таа посочи и дека пред прогласувањето на епидемијата водата била оценета како исправна.
„Бидете сериозни барем еднаш – објавете го документот“, порача Борозан.
СДСМ инсистира надлежните институции јавно да ги објават резултатите од анализите и да преземат одговорност за информациите што ги соопштуваат до граѓаните.