Родителите во Македонија можат да бидат мирни – спорната серија на храна за бебиња од брендот „HiPP“, која во моментов е предмет на повлекување во Австрија и неколку други европски земји, воопшто не е пласирана на македонскиот пазар.
Од Агенцијата за храна и ветеринарство (АХВ) потврдуваат дека до овој момент немаат добиено нотификација преку Системот за брзо известување за небезбедни производи на Европската унија (RASSF). Станува збор за производ од 190 грама во стаклена тегличка со вкус на морков и компир.
Освен официјалната потврда од АХВ дека ситуацијата се следи, пристигна и гаранција од увозникот. Овластениот дистрибутер на „HiPP“ за Македонија доставил писмено известување до Агенцијата со кое потврдува дека спорниот производ никогаш не бил увезен во земјава, ниту пак се нашол на полиците во маркетите.
АХВ останува будно да ја следи состојбата, но во овој момент нема причини за загриженост кај потрошувачите.