Две експлозии ја потресоа ноќта помеѓу среда и четврток во Франкфурт, при што едната се случила на централната шопинг улица Цајл, а втората на улицата Бергер. Полицијата потврди дека по неколкучасовно пребарување едно лице е уапсено во областа на улицата Бергер, додека во инцидентите нема повредени.
Портпаролката на полицијата изјави за „Билд“ дека двете експлозии биле пријавени во исто време, при што на улицата Цајл мета бил киоск, а на улицата Бергер продавница. Жителите биле вознемирени од силината на детонациите.
„Експлозијата беше екстремно гласна. Беше како војна“, изјави еден жител за германската новинска агенција (dpa), додавајќи: „Никогаш порано не сум слушнала нешто слично. Ми помина низ целото тело“.
Други сведоци пријавиле и маж со качулка кој се криел во дворенска жива ограда, по што полицијата интервенирала. Инаку, на почетокот на неделата во Франкфурт се случија уште три експлозии, за кои вишиот јавен обвинител Доминик Мис информираше дека бил уапсен 15-годишен холандски државјанин.
„Станува збор за 15-годишен холандски државјанин. Тој е обвинет за предизвикување експлозија со употреба на експлозиви“, изјави Мис, додавајќи дека трагите упатуваат на меѓународни феномени на организиран криминал и таканаречено „насилство по нарачка“.