Лидерот на албанските опозициски демократи, Сали Бериша, на вечерешниот протест пред зградата на Владата во Тирана порача дека опозицијата ќе продолжи да се бори „до соборување на нарко-диктатурата во државата“, истакнувајќи дека има поддршка од меѓународната заедница.
„Демократите и опозицијата не се сами во својата борба со злото, туку имаат поддршка од луѓето што ја сакаат слободата и вистината, низ целиот свет. Времето го повикува секој млад Албанец да се спротивстави за да ја спаси земјата од оваа вистинска катастрофа во која потонува“, рече Бериша.
Тој обвини дека „нема нација во светот што е повеќе ограбена од албанската“, наведувајќи ја штетата од последните поплави и тврдејќи дека владините политики довеле до дополнителна дестабилизација. Како пример, посочи дека „во период од седум години се потрошени 400 милиони евра за согорување на отпад во Тирана, Фиер и Елбасан“, а ниту една од постројките, според него, денес не функционира.
Бериша најави нови протести и порача дека опозицијата ќе остане пред Владата „сè до заминувањето на крадците од владата“, споредувајќи го премиерот Еди Рама со венецуелскиот претседател Николас Мадуро, кого го обвини дека „ги украл изборите“.
„Не го одбравме ова место залудно. Секој од вас треба да знае, потребни се жртви. Ќе се собереме тука, ова е наш плоштад, ова е плоштад на слободата. Ќе ја ослободиме и таа зграда. Дојдовме тука да застанеме против непријателот. Дојдовме тука никогаш да не го напуштиме овој плоштад без победа“, порача тој.
Бериша исто така информираше дека пристигнал од Бразил, каде учествувал на Конгресот на CDI и бил избран за потпретседател на организацијата, што го нарече „чест за демократите и нивната жртва“.
Протестот, втор од најавената серија, заврши мирно и со релативно слаба присутност.