Шефот на француската дипломатија, Жан-Ноел Баро, повторно предупреди на обиди за мешање во претседателските избори во земјата следната година, именувајќи го американскиот милијардер Елон Маск меѓу личностите што влијаат врз демократските дебати во Европа, објавија француските медиуми.
Со приближувањето на изборите во 2027 година, „непријателите на демократијата прават сè што можат за да нè дестабилизираат“, рече Баро на конференцијата на Организацијата за економска соработка и развој (ОЕЦД).
„Тие ги искористуваат поделбите меѓу нас и користат прашања како што се имиграцијата, секуларната природа на државата и израелско-палестинскиот конфликт за да поттикнат омраза и тензии“, истакна тој, додавајќи дека овие дејствија веќе се опширно документирани.
Министерот наведе конкретни примери, вклучително и израелска компанија што создала лажни француски профили „за да организира вештачки судири по палестинското прашање“, како и „големи кампањи за онлајн вознемирување од страна на Елон Маск против европските лидери, со цел да влијае врз националните дебати користејќи ја неговата социјална мрежа“, чии пораки се шират во голем обем.
Баро, исто така, спомена „подмолни кампањи што сугерираат дека следните претседателски избори во Франција ќе бидат наместени“.
Францускиот министер за надворешни работи, исто така, го осуди користењето на студентските протести во Франција од страна на „непријателски наративи што доаѓаат од Русија и Кина, како и од Иран и заедницата MAGA“, движење поврзано со поддржувачите на американскиот претседател Доналд Трамп.
„Она што се случува во Франција не е ништо повеќе од неконтролирана масовна имиграција. Не станува збор за училишта, туку за исламот што сака да ја преземе некогаш големата земја!“, напиша Трамп минатата недела на својата платформа Truth Social.
„Ги гледаме, ги разоткриваме и одговараме на нив со бескомпромисна цврстина. Нема да толерираме никакво странско мешање, без разлика од каде доаѓа. Ова е прашање на суверенитет“, одговори францускиот министер.