По вчерашната евакуација на 151 лице од Дубаи, кои вчеравечер пристигнаа на Скопскиот аеродром, се очекува следниот авион да пристигне во вторник, со приближно ист број патници.
Третиот лет е планиран за средината на неделата, но сѐ уште се чека да се утврди дали ќе има зголемен интерес кај македонските граѓани кои се наоѓаат во ризичните подрачја, за летот да биде целосно пополнет.
Како што изјави министерот за надворешни работи и надворешна трговија, Тимчо Муцунски, во тек се активности и за евакуација на македонски државјани кои се наоѓаат во Бахреин, Катар и Кувајт. Планирано е тие најпрво да бидат префрлени во Саудиска Арабија, од каде што во среда се очекува да бидат донесени во земјава со авион.
– Вкупно 14 граѓани кои требале да бидат на денешниот лет од Дубаи за Скопје до последен момент најавувале дека ќе дојдат, но не се појавиле на аеродромот. Ги повикуваме нашите државјани, кога одлучуваат да не ја користат оваа услуга, на евакуирање, да не информираат навреме за тоа. Среќа што бевме подготвени и што се ангажираше нашата Амбасада со листа на чекање, да ги пополниме тие 14 места со граѓани што требаше да бидат на летот во вторник. Замолувам и апелирам на максимална одговорност зашто се трошат буџетски средства. Кога е во прашање безбедноста, нашата цел е секој лет да биде пополнет до последното возможно место.- Во минатото сме имале пракса за репатријација да плаќаат спрема државниот буџет. Граѓаните плаќаат даноци, да знаат дека државата во моментот на криза, кога има вакви ситуации, таа секогаш ќе работи на обезбедување најбезбедни услови за нив. Ние сме една од ретките држави која го прави ова на ваков начин, но сметаме дека системот колку и да има свои предизвици, секогаш, во вакви сложени моменти, мора на граѓанинот да му даде сигурност, да знаете, дека кога сте македонски државјани, институциите стојат позади вас, подвлече министерот.
Граѓаните кои од Дубаи пристигнаа во Скопје, беа исклучително среќни и изразија голема благодарност до Владата за организацијата на целиот процес на евакуација.
– Се организиравме преку Амбасадата која претходно ја контактиравме, среќни сме, стигнавме дома. Додека бевме во Дубаи се слушаа експлозии, аларми преку ноќ не будеа од спиење, не беше баш пријатна ситуацијата. Блиску не слушнавме експлозија, ниту видовме повредени, но, сепак, воопшто не беше пријатно, изјави патникот.
Министерот, кој ги пречека патниците директно, пред авионот, се поздравуваше со секој од нив, а на припадничките од понежниот пол им подари и по една ружа, во чест на празникот 8 Март.