Лет на авиокомпанијата „Изиџет“ од Лондон за Анталија минатата среда бил прекинат и пренасочен кон Меѓународниот аеродром во Приштина, откако меѓу патниците избила жестока тепачка.
Како што пренесува „Дејли мејл“, инцидентот го предизвикала патничка која конзумирала алкохол директно од шише и му плукнала во лице на друг патник. На видео снимките од летот се гледа како таа се обидува физички да се пресмета со патник преку седиштата, по што интервенирал персоналот и други патници.
„Седев зад нив и си гледав своја работа кога одеднаш слушнав викање и галама. Подигнав поглед и не можев да поверувам што се случува, беше целосно лудо. Жестоко се расправаа и си пцуеја. Сите беа малку исплашени, се чувствувавме беспомошно и ни беше жал за персоналот“, изјавил сведок за медиумите.
По слетувањето во Приштина, полицијата влегла во авионот и ги привела двајцата инволвирани патници. Летот продолжил кон Турција со три часа задоцнување.
Од „Изиџет“ потврдија дека безбедноста е нивен приоритет и нагласија дека имаат нулта толеранција за непримерно однесување. Овој случај повторно ја отвори дебатата за ограничување на алкохолот на аеродромите, повик кој неодамна го упати и првиот човек на „Рајанер“, Мајкл О’Лири.