Русија ја поздрави новата национална безбедносна стратегија на САД како позитивен чекор за билатералните односи, соопшти портпаролот на Кремљ, Дмитриј Песков.
Ревизијата на администрацијата на Трамп, „која повеќе не ја наведува Русија како директна закана“, претставува позитивен сигнал, изјави Песков за државната агенција ТАСС. Како што пренесе ДПА, тој додаде дека Москва внимателно ќе ја анализира ажурираната стратегија, која значително се разликува од претходните американски пристапи кон Русија.
Белата куќа ја објави новата стратегија во четвртокот. Иако ставањето крај на војната во Украина е наведено како клучен американски интерес, документот содржи малку критички осврти кон Русија.
Стратегијата нагласува дека прекинувањето на непријателствата е неопходно „за стабилизирање на европските економии, спречување на ненамерна ескалација или проширување на војната“ и повикува на „стратешка стабилност“ во односите со Москва.
Истовремено, документот содржи критики кон Европа, наведувајќи намалување на демократијата и слободата на говор, како и потреба од корективни мерки. Се посочуваат проблеми како миграциските политики, „цензурата на слободата на говорот и сузбивањето на политичката опозиција, намалувањето на наталитетот и губењето на националните идентитети и самодовербата“