Владата го именуваше Арбен Фетаи за специјален пратеник за Европската Унија со седиште во Брисел. Информацијата ја објави самиот Фетаи на социјалните мрежи, посочувајќи дека новата функција му претставува голема чест, но и сериозна одговорност.
Како што истакна тој, главниот фокус на неговиот ангажман ќе биде унапредувањето на евроинтегративниот процес на земјата, како и обезбедувањето поддршка во институциите и меѓу земјите-членки на Европската Унија.
Фетаи наведе дека ќе работи на надминување на политичките и дипломатските предизвици, со цел гласот на Северна Македонија да биде поприсутен во Брисел и останатите европски метрополи.
Позовавајќи се на своето долгогодишно работно искуство во Брисел и во владиниот сектор, тој потенцираше дека иметувањето го прифаќа со уверување во европската перспектива на државата.
Во објавата, тој изрази благодарност до премиерот и Владата за укажаната доверба.
„патот кон Брисел продолжува – со решителност, партнерство и целосна верба во нашата европска иднина“, порача Фетаи.