Иранскиот министер за надворешни работи, Абас Аракчи, изјави дека Техеран цврсто останува на својата позиција како главен гарант за стабилноста во стратешки важниот Ормутски Теснец. Преку официјална објава на социјалната платформа Икс, шефот на иранската дипломатија сподели дека остварил плодни и конструктивни разговори со својот индиски колега, Субраманјам Џајшанкар, при што јасно ставил до знаење дека Иран безкомпромисно ќе ја исполнува својата историска должност како чувар на безбедноста во овој воден премин.
Аракчи, кој во моментов престојува во Њу Делхи на дводневниот состанок на министрите за надворешни работи на земјите од БРИКС, упати смирувачка порака до меѓународната заедница во време кога Блискиот Исток се соочува со сериозни безбедносни потреси. Тој нагласи дека сите пријателски земји можат целосно да сметаат на безбедноста и заштитата на нивните трговски рути за време на поморскиот транспорт низ теснецот, кој претставува клучна артерија за глобалниот енергетски пазар.
Овој дипломатски ангажман се случува во рамките на проширениот сојуз БРИКС, кој е основан во 2006 година од страна на Русија, Кина, Индија и Бразил. Глобалната тежина на оваа економска групација постојано расте, особено по неколкуте бранови на проширување – во 2011 година на блокот му се приклучи Јужна Африка, во 2024 година членки станаа Египет, Етиопија, Обединетите Арапски Емирати и самиот Иран, додека во 2025 година официјално се приклучи и Индонезија.