Од Форумот на жени на СДСМ преку прес-конференција упатија жестоки критики до премиерот Христијан Мицкоски, квалификувајќи ја неговата последна изјава како скандалозна заштита на насилството врз жените. Розалија Ангелковска истакна дека минимизирањето на бруталното претепување на жена од страна на неговиот бодигард е поразителна порака до жртвите.
„Изјавата на Христијан Мицкоски дека бруталното претепување на жена од неговиот бодигард е ‘мал престап и системот функционира’ е скандалозна, опасна и недозволива. За Мицкоски, семејното насилство и тепањето жена се ‘мал престап’. Поразителна порака до сите жени-жртви на насилство во државата“, обвинуваат од СДСМ.
Според партијата, ваквиот став претставува директна заштита и за министерот за внатрешни работи, Панче Тошковски. Од СДСМ посочуваат дека додека власта зборува за безбедност, државата тоне во насилство и неказнивост за блиските луѓе до функционерите.
Во соопштението се потсетува на низа трагични случаи во Велес, Кочани и Старо Нагоричане, каде институциите не реагирале соодветно на пријавите за насилство.
„По сите овие скандали, по целосниот распад на безбедносниот систем и по срамната изјава на Мицкоски, Панче Тошковски нема никаков кредибилитет да остане министер. Оставка од Тошковски веднаш!“, порача Ангелковска.