Претседателот на Општинскиот комитет на ВМРО-ДПМНЕ Гостивар, Мартин Андоновски, на денешната прес-конференција излезе со барање Венко Филипче и Рената Младеновска да објаснат зошто не реагирале на извештаите за квалитетот на водата во градот.
Андоновски посочи дека лицата кои претходно ги раководеле институциите сега се обидуваат да го префрлат фокусот од сопствената одговорност.
„Почитувани, Филипче и Рената Младеновска треба веднаш да кажат зошто со години молчеле за загадената вода во Гостивар. Токму оние кои со години имаа политичка и институционална моќ денес најгласно се обидуваат да ја префрлат одговорноста“, изјави Андоновски.
Тој јавно праша за причините поради кои не биле преземени мерки по добивањето на официјалните документи.
„Наместо денес да морализираат, треба да одговорат зошто не постапиле по добиените над 400 извештаи кои укажувале загадена вода? Гостиварци мора да дознаат зошто биле труени со години, а СДС и Филипче не презеле никакви чекори“, додаде тој.
Претседателот на ОК ВМРО-ДПМНЕ Гостивар истакна дека актуелната власт веќе ги презема сите неопходни чекори за снабдување на населението.
„За среќа, Владата предводена од ВМРО-ДПМНЕ интервенираше за граѓаните да добијат техничка вода и флаширана вода за пиење. Но паралелно со решавањето на актуелната состојба, мора да се расчисти и минатото“, нагласи Андоновски.
На крајот, тој побара соодветна правна реакција од страна на правосудните органи.
„Затоа го повикуваме ЈО да отвори случај по допрен глас и да ги истражи документите кои ги споделивме во јавноста“, заклучи Андоновски.