Амазон започна планови за масовна автоматизација на своите операции, со што би се избегнало вработување на повеќе од 600.000 работници во СAД до 2033 година, според интерни документи до кои дојде Њујорк Тајмс.
Документите откриваат дека компанијата очекува, со помош на роботи, да го удвои обемот на продажба со помала работна сила. Според извештајот, одделот за роботика на Амазон има за цел да автоматизира дури 75 проценти од сите деловни процеси во магацините и логистиката. До 2027 година, автоматизацијата би можела да елиминира околу 160.000 работни места, заштедувајќи ѝ на компанијата околу 12,6 милијарди долари, или 30 центи по испратена ставка.
Во исто време, Амазон разгледува начини за ублажување на реакциите на јавноста на потенцијални загуби на работни места. Во компанијата, според документите, се препорачува да се избегнуваат термини како „автоматизација“ или „вештачка интелигенција“, со предлог да се користи терминот „напредна технологија“ или „кобот“ – робот што соработува со луѓе.