Министерот за здравство Азир Алиу учествува на дванаесеттиот состанок на високо ниво на Иницијативата за мали земји на Светската здравствена организација за Европа, кој се одржува во Рига, Летонија.
Дводневниот состанок е посветен на предизвиците со кои се соочуваат малите земји во Европа, вклучително ограничените ресурси, миграцијата на здравствениот кадар, стареењето на населението и зголемените потреби на пациентите, со цел развој на одржливи и иновативни решенија за здравствените системи.
Министерот Алиу во своето обраќање истакна дека малите земји можат да бидат пример за брза адаптација, добра координација и силна политичка волја за реформи, нагласувајќи дека целта е создавање поефикасен систем насочен кон пациентите и намалување на административните оптоварувања за здравствените работници.
Тој учествуваше и во сесија посветена на оптимизација на здравствената работна сила, каде ја претстави Националната стратегија за дигитално здравство 2026–2030, посочувајќи дека дигитализацијата треба да придонесе за подобра организација на здравствениот систем и поефикасна грижа за пациентите.
Во рамки на дискусиите за дигитализација и вештачка интелигенција, министерот нагласи дека новите технологии можат значително да го унапредат здравството, но не смеат да ја заменат човечката одговорност во медицинската пракса.
Учеството на состанокот во Рига, како што наведуваат од Министерството за здравство, е дел од заложбите за активна европска соработка и примена на современи решенија за унапредување на здравствениот систем.