Во белгиската провинција Антверпен, неколку млади луѓе се хоспитализирани во последните недели, откако пушеле електронски цигари полнети со течност од „домашно производство“. Белгиските медиуми јавуваат дека дел од хоспитализираните се во „многу загрижувачка“ здравствена состојба, а еден од нив е сè уште во кома.
Првичните анализи на крвта на хоспитализираните сугерираат дека течноста во е-цигарите можеби ја содржела психоактивната компонента на канабисот ТХЦ, но експертите предупредуваат на многу поголема опасност.
Професорот Филип Лардон од Универзитетот во Антверпен објаснува дека во домашните е-течности често се мешаат лекови, марихуана и синтетички дроги познати како „спајс“.
„Тие се познати и како „спајс“ и во нив концентрациите на канабис се неколку пати поголеми отколку во, да речеме, обичен џоинт“, вели Лардон.
„Спајс“ е сленг термин за група синтетички дроги дизајнирани да го имитираат канабисот, но се многу посилни, дури и до 50 пати, и може да предизвикаат зависност слична на хероинот.
Користењето „спајс“ може да предизвика губење на свеста, болки во градите, па дури и мозочен удар.
Професорот Лардон наведува дека ваквите е-цигари се шират низ училиштата во Антверпен и други белгиски реони, предупредувајќи дека „само го чекаме првиот смртен случај“.