Вкупно 16 деца со пријавени труења годинава биле згрижени на детското одделение при Општата болница во Куманово. Началничката на детскиот оддел во болницата, д-р Маргица Арсовска, информира дека родителите најчесто бараат помош за деца од две до четири години кои испиле детергенти, лекови или средства за чистење.
– Најчести кај нас се труењата од лекови, без разлика дали станува збор за антибиотици, седативи, лекови за срце или дијабетес. Потоа имаме средства во домаќинството, разни средства за чистење, пестициди, а имаме и деца што јадат растенија. Децата истражуваат, сакаат да ја запознаат околината, но понекогаш тоа значи и дека ќе пробаат нешто што може да биде опасно – вели Арсовска.
Таа посочува дека најчесто станува збор за краткотрајно невнимание на родителите и советува правилно складирање на лековите и хемикалиите во домот како мерка за превенција.
– Во потешки случаи може да дојде и до губење на свеста, а одредени хемиски средства може да предизвикаат сериозни оштетувања на хранопроводот и желудникот – изјави таа.
Доколку постои сомнеж за труење, Арсовска нагласува дека е клучно брзо однесување на лекар во првите два часа и понесување на оригиналната амбалажа.
– Битно е родителот, ако се сомнева дека детето испило нешто, да го понесе шишенцето или кутијата од лекот, таблетата, да знаеме кој лек е испиен, приближната доза, колку останало во кутивчето и колку време поминало од моментот кога се сомневаат дека детето го испило. Тоа многу влијае во понатамошниот третман – објаснува Арсовска.
Лекарите апелираат родителите да не предизвикуваат повраќање на своја рака.
– При труење со хемикалии и детергенти родителите не треба самостојно да предизвикуваат повраќање бидејќи тоа може дополнително да го оштети организмот, особено кај корозивни средства – вели Арсовска.
Особено внимание треба да се посвети на префрлањето на хемикалии во други садови.
– Сите овие средства треба да се чуваат надвор од дофат на децата, без разлика дали се заклучени или ставени на високо место. Не треба да се менува нивната амбалажа. Ако, на пример, разредувач или боја се префрли во друго шише, детето може да помисли дека станува збор за сок и да го испие. Имаме и такви случаи. Затоа средствата треба да се чуваат во оригиналната амбалажа, со соодветна ознака и на безбедно место – вели Арсовска.
Таа заклучува дека превенцијата и здравствената едукација на родителите се клучни за намалување на ваквите случаи.
– Затоа најважно е родителите да бидат внимателни и лековите и сите потенцијално опасни средства да ги чуваат подалеку од децата – порачува Арсовска.