Прашањето за контролата врз Гренланд повторно ги разбранува односите на релација Нук – Копенхаген – Вашингтон. Премиерот на Гренланд, Јенс-Фредерик Нилсен, денес во своето обраќање пред Парламентот на Данска изрази сериозна загриженост дека САД сè уште имаат амбиции за воспоставување доминација над островот.
Иако американскиот претседател Доналд Трамп неодамна ја отфрли можноста за употреба на воена сила, Нилсен смета дека стратешкиот интерес на Вашингтон останува непроменет. Тој пред данските пратеници порача дека Соединетите Држави „упорно бараат начин“ да обезбедат сопственост и директна контрола врз оваа стратешки важна територија.
Според премиерот, интензивираната реторика на Трамп од почетокот на годината не е само политички маневар, туку реален тест за границите на политичкото влијание. Нилсен предупреди дека самото „планирање за контрола“ создава долгорочен притисок и неизвесност врз гренландскиот народ. Темата за иднината на Гренланд ќе остане отворено прашање сè додека не се разјасни дали овие намери ќе преминат во конкретни дипломатски или политички чекори кои би ја промениле сегашната рамка на управување.