Американското претставништво за Иран упати итен апел до своите државјани веднаш да ја напуштат земјата поради драстично влошување на безбедносната состојба. Предупредувањето доаѓа во време кога немирите во повеќе делови на Иран продолжуваат да ескалираат.
Во официјалното соопштение се нагласува дека граѓаните треба да заминат без да очекуваат помош од владата на САД, а како опција за евакуација се препорачува копнен пат преку Ерменија или Турција. Властите предупредуваат и на можни прекини на интернетот и телекомуникациите.
Посебен акцент е ставен на лицата со двојно државјанство. Американските власти нагласуваат дека тие мора да патуваат со ирански пасоши, бидејќи поседувањето американска патна исправа може да биде причина за итно приведување.
Оваа одлука на Вашингтон се надоврзува на претходните чекори на претседателот Доналд Трамп, кој најави царини од 25% за земјите кои соработуваат со Техеран. Иако Трамп тврди дека не сака војна, Белата куќа потврди дека се разгледуваат сите сценарија, вклучително и воени опции.