Јапонските власти денеска наредија итна евакуација на повеќе од два милиони луѓе поради сериозни предупредувања од поплави и лизгање на земјиштето, соопштено е по приближувањето на тајфунот Мехала.
Претходно, обилните дождови предизвикани од бурата парализираа делови од Тајван, каде приближно шест милиони луѓе останаа без работни обврски, а учениците беа ослободени од настава.
Иако во меѓувреме ослабе во тропска бура, Мехала во моментов се движи кон јужните јапонски острови Рјукју, носејќи со себе силни ветрови и екстремни врнежи кои веќе ги погодија јужните и западните делови на Јапонија.
Јапонското Министерство за транспорт соопшти дека досега се откажани повеќе од 200 летови. Десетици железнички линии се во прекин, а затворени се и голем број автопати низ земјата.
Метеоролошката агенција на Јапонија издаде предупредување дека сезонскиот фронт, проследен со прилив на топол и влажен воздух, ќе продолжи да предизвикува интензивни врнежи, особено во западниот регион.
Поради невремето, автомобилскиот гигант Тојота го прекина производството во својата фабрика на јужниот остров Кјушу, а одлуката за продолжување на втората смена ќе биде донесена дополнително.
На Тајван, локалните власти во трите погодени региони наредија комплетно затворање на канцелариите и училиштата. Големите поплави во градот Тајнан целосно го нарушија железничкиот сообраќај на главната линија север-југ.
Во северниот град Хсинчу, каде што се наоѓа седиштето на најголемиот светски производител на чипови TSMC, исто така е прогласен прекин на работата и наставата.
„Преземени се превентивни мерки во сите тајвански погони за подготовка за дождот и фабриките во моментов работат нормално“, се наведува во официјалното соопштение на компанијата TSMC.
Во четирите најпогодени области на Тајван живеат околу шест милиони луѓе, а во руралниот регион Пингтунг наврна речиси еден метар дожд на квадратен метар.