Граѓаните имаат можност уште денеска и утре да запишат граѓански обврзници од третата емисија во деловните банки низ земјава, пред да се затвори повикот.
Оваа емисија на хартии од вредност нуди каматна стапка од 4,5 проценти годишно, со рок на доспевање од две години. Минималниот износ за учество, односно цената на една обврзница, изнесува 10.000 денари.
Според објавениот проспект, државата планира да прибере 100 милиони денари, а аукцијата е закажана за петок, 12 декември.
Исплатата на приносите е прецизирана – каматата за првата година ќе биде исплатена на 19 декември 2026 година, додека главнината заедно со каматата за втората година ќе биде исплатена на 19 декември 2027 година.