Официјалните ветеринари на Агенцијата за храна и ветеринарство (АХВ) спречија увоз на 23.685 килограми замрзнато пилешко месо со потекло од Бразил.
Како што информира АХВ, пратката е одбиена поради непочитување на донесеното решение за забрана за увоз на живи животни, производи и нуспроизводи од животинско потекло, воведено заради заштита од внесување на вирусот на високопатогена авијарна инфлуенца (птичји грип) во земјава.
Според образложението, пратката била произведена во јануари 2025 година, а согласно мерките е забранет увозот на пратки добиени од животни кои се заклани, натоварени и сертифицирани пред 1 август 2025 година.
Од АХВ посочуваат дека и претходно, во декември 2025 година, официјалните ветеринари на истиот граничен премин вратиле пратка со над 26 тони замрзнат пилешки батак со потекло од Бразил, поради истата причина.
Оттаму апелираат до увозниците да ги почитуваат законските и подзаконските акти и стандардите за безбедност на храната, нагласувајќи дека здравјето на граѓаните е приоритет.