ДУИ им даде јавна поддршка на кандидатите кои доаѓаат од партијата на Таравари и кои ќе прават нов обид да стигнат до градоначалничките позиции во општините Гостивар и Врапчиште.
Генералниот Совет ја потврди едногласната поддршка за:
• г. Валбон Лимани, кандидат за градоначалник на Општина Гостивар
• г. Исен Шабани, кандидат за градоначалник на Општина Врапчиште
ДУИ оценува дека овие кандидатури ја претставуваат сериозноста, посветеноста и визијата на коалицијата за развој на општините и благосостојбата на граѓаните.
Во одлуката се истакнува дека резултатите од претходните избори покажаа јасна и убедлива разлика во корист на Националната Алијанса за Интеграција, разлика која произлезе од заедничката работа, ангажманот на терен и широката народна поддршка. Генералниот Совет оценува дека оваа предност ќе се продлабочи уште повеќе, благодарение на довербата на граѓаните и заедничкиот ангажман – се вели во соопштението на ДУИ.
Од партијата велат дека ќе ги стават во погон сите партиски структури за да се даде придонес овие две кандидатури да ги добијат дополнителните избори во овие општини откако во редовниот изборен процес не беше постигнат потребниот цензус.
Ваквата порака на ДУИ доаѓа во време кога Села ја напушти коалицијата а се најавува и фрагментирање на пратеничката група и прелети кон мнозинството па оттука, таа може да се сфати и како чекор на Ахмети во насока на тоа да ја „закрпи“ коалицијата која се соочува со сериозни предизвици.