Германската управа за контрола на летање пушти во употреба нов систем за детекција на дронови на главниот аеродром во Берлин, соопшти Министерството за транспорт на Германија. Технологијата е наменета за рана детекција на беспилотни летала во зоните за полетување и слетување, со цел навремено предупредување на надлежните служби за ризиците по воздушниот сообраќај.
Министерот за транспорт Штефен Билгер, кој доцна синоќа ја посети локацијата на аеродромот Берлин Бранденбург (БЕР), ја истакна сериозноста на овие закани и порача:
– Многу сериозно ја сфаќаме растечката закана што ја претставуваат дроновите околу аеродромите.
Тој додаде дека е од исклучителна важност брзо да се реагира и германските меѓународни аеродроми да се опремат со ваква технологија, особено по серијата забележани инциденти. Според податоците од германската контрола на летање, во првите шест месеци од годината токму аеродромот БЕР регистрирал рекордни 28 случаи на појава на дронови – еден повеќе од аеродромот во Франкфурт – при што во седум наврати сообраќајот мораше привремено да биде прекинат. Се очекува слични системи наскоро да добијат и другите германски аеродроми.