Авиосообраќајот во земјава бележи значителен раст, што според вицепремиерот и министер за транспорт Александар Николоски е резултат на политиката на субвенционирање воведена во 2024 година, а која започна да се применува во 2025 година.
Николоски посочи дека бројот на патници на двата македонски аеродроми континуирано расте. Во јули годинава сообраќајот бил зголемен за 21 отсто во споредба со истиот месец лани, додека во август растот достигнал 31 отсто.
Според него, кога актуелната Влада го започнала мандатот, двата аеродроми заедно имале околу 2,4 милиони патници годишно. Наместо очекуваните 3,2 до 3,3 милиони патници до крајот на првиот мандат, бројката од три милиони е достигната за само една година, а годинава се очекува да биде достигната границата од четири милиони патници.
Николоски истакна дека Скопскиот аеродром е една од најзначајните бази на „Визер“ во Европа, а авионите кои преноќуваат во Скопје се од поновиот тип „Airbus A321neo“, кои, според него, имаат пониска емисија на штетни гасови.
Раст бележи и Охридскиот аеродром. Според Николоски, годинава се очекуваат меѓу 350.000 и 400.000 патници, што значително ги надминува проекциите поставени при доделувањето на концесијата. Тој најави и можност „Визер“ да ја прошири својата база во Охрид со дополнителен авион.
Во однос на новите авиолинии, Николоски информираше дека се прецизира отворањето на директната линија Скопје–Дубаи. Според него, воспоставувањето на оваа линија би било значајно за деловниот сектор и за туристичкиот потенцијал, особено имајќи го предвид растечкиот интерес на европските компании и туристите за Обединетите Арапски Емирати.