Познатата македонска пејачка и професорка, Адријана Јаневска, се огласи на социјалните мрежи по серијата обвинувања дека наводно извршува повеќе советнички функции истовремено. Во јавноста се појавија тврдења дека таа е ангажирана како советник за култура кај министерот Љутков, претседателката и премиерот, за што наводно добива високи месечни хонорари.
Јаневска категорично ги отфрли ваквите наводи, карактеризирајќи ги како обид за нејзина професионална и лична дискредитација преку ширење невистини.
„Намерно напишани лаги за да се избегне тужба“
Во својата реакција, пејачката посочува дека нападот е смислен и стратешки поставен за да се заобиколат правните последици.
„Деновиве сум мета на организиран напад на социјалните мрежи. Објавите се намерно напишани во прашална форма со очигледна намера да се избегне тужба за клевета. Вообичаено не се осврнувам на озборувања, но овојпат станува збор за лага во врска со наводни месечни примања, со што се прави обид за моја дискредитација.“
Таа дополнително го изрази своето разочарување од моменталната состојба со дигиталната етика:
„За жал, на социјалните мрежи секој може да напише што сака, без да понесе одговорност за напишаното.“