Лидерот на ВМРО-ДПМНЕ, Христијан Мицкоски, на митинг во Демир Капија, во рамки на кампањата за локалните избори, го обвини СДСМ дека преку „малкумина лакеи“ во обвинителството и судството опструира големи случаи на корупција. „Нема големи кривични случаи само поради една причина, а тоа се малкумина ваши лакеи кои ги има во обвинителството и судството… иако истражните органи сработија десетици случаи на висока корупција кога влада беа СДС и ДУИ,“ рече Мицкоски.
Тој додаде дека „грчевито нивните лакеи заедно со нив се борат да се опструираат истрагите поткрепени со докази,“ најавувајќи кадровски промени по локалните избори: „Локалните избори ќе завршат и вашите лакеи ќе бидат сменети и ќе дојдат вистински судии и обвинители и ќе одговарате. Обрачот се стега и нема бегање од одговорност.“
Настанот се одржа под слоганот „Вистинскиот избор! Твојот човек! Твоето место! За твојата иднина!“, а Мицкоски го адресираше претседателот на СДСМ, Венко Филипче, како повод за реплика на неговата изјава дека во изминатите 15 месеци „немало големи кривични случаи“. „Морам да прокоментирам една изјава на претседателот на СДСМ… затоа чувствувам потреба да му одговорам,“ рече Мицкоски.