Вработените во приватниот сектор и годинава имаат право на регрес за годишен одмор (К-15) во минимален износ од околу 19.415 денари, согласно пресметката врз основа на просечната нето-плата.
Право на К-15 имаат работниците кои работеле најмалку шест месеци во календарската година кај истиот работодавач. Исплатата претставува законска обврска за работодавачите опфатени со колективниот договор.
Регресот за годишен одмор треба да се исплати до крајот на календарската година, односно најдоцна до 31 декември.
К-15 е наменет за покривање на дел од трошоците за годишниот одмор, а неговиот минимален износ се утврдува според просечната нето-плата во претходните три месеци.
Работниците треба да знаат дека правото на регрес не е прашање на добра волја на работодавачот, туку произлегува од колективните договори.
Работниците на кои работодавачот им бара да го вратат веќе исплатениот К-15 можат да го пријават случајот во Државниот инспекторат за труд, ССМ, полицијата или Јавното обвинителство, при што се препорачува да ги зачуваат сите докази за ваквото барање, како пораки, преписки или банкарски изводи.
Согласно член 166 став 2 од Кривичниот законик, работодавачот кој ќе побара од работникот да му врати дел од исплатената плата или други надоместоци може да одговара кривично, за што е предвидена казна затвор од три месеци до една година. За правното лице, одговорноста може да повлече и парична казна.

