Надзорниот одбор на Комерцијална банка АД Скопје денеска донесе одлука банката да учествува на јавната берзанска аукција за продажба на обичните акции на Алта банка АД Битола, соопштено е преку Македонската берза.
„Согласно Правилата за котација, известуваме за следната ценовно чувствителна информација: Комерцијална банка АД Скопје ја известува јавноста дека Надзорниот одбор на Банката, на 19 ноември 2026 година, донесе Одлука за учество на Банката на јавната берзанска аукција согласно Објавата за продажба на обични акции издадени од Алта банка АД Битола кои ќе бидат понудени на продажба преку Македонската берза на хартии од вредност АД Скопје по пат на јавни берзански аукции, објавена на 16 ноември 2026 година во Службен весник на Република Северна Македонија бр.267/26“, се наведува во берзанската објава.
Продажбата на Алта банка АД Битола беше покрената откако Народната банка на Србија кон крајот на октомври ја одзеде дозволата за работа на Алта банка во Србија, а македонската Народна банка воведе администрација во битолската банка.
По преземањето на администрацијата, гувернерот Трајко Славески изјави дека веќе има заинтересирани инвеститори за преземање на банката.

