Собраниската Комисија за финансирање и буџет денеска треба да ја продолжи расправата за Предлог-буџетот за 2027 година, по тридневната дебата во која власта и опозицијата изнесоа спротивставени ставови за планираните приходи и расходи на државата.
Од ВМРО-ДПМНЕ оценуваат дека предложениот буџет претставува продолжување на фискалната консолидација, зачувување на стабилноста на јавните финансии, создавање услови за економски раст и реализација на развојни инвестиции. Од СДСМ, пак, сметаат дека станува збор за документ без визија, кој не нуди ниту отчетност ниту развој.
Покрај Комисијата за финансирање и буџет, денеска во Собранието ќе заседаваат и Законодавно-правната комисија и Комисијата за социјална политика, демографија и млади.
На дневен ред на Законодавно-правната комисија се повеќе предлог-закони во второ читање. Меѓу нив се измените на законите за Фондот за осигурување на депозити, земјоделство и рурален развој, задолжително капитално финансирано пензиско осигурување и семејство, како и предлогот за престанување на важењето на Законот за координација на безбедносно-разузнавачката заедница.
Комисијата за социјална политика, демографија и млади, пак, ќе ги разгледува измените на законите за задолжително и доброволно капитално финансирано пензиско осигурување, како и измените на Законот за семејството. Сите точки се во второ читање.

