Патарините на македонските автопати би можеле да добијат нов начин на наплата, без запирање на возилата на наплатните станици. Владата размислува за воведување електронски систем со кој граѓаните би плаќале според бројот на изминати километри.
Вицепремиерот и министер за транспорт Александар Николоски најави дека ќе се подготвува законско решение за новиот модел, при што ќе биде побарана и експертска помош од Европската транспортна заедница.
Според Николоски, ваквиот систем би овозможил побрз проток на сообраќајот, поголема безбедност и поправедна наплата, бидејќи возачите би плаќале само за делницата што навистина ја користеле.
Нашата идеја е да се наплаќа по километар, што ќе биде многу поправедно од ова што се случува сега. Теоретски, ако тргнете од Демир Капија и одите во Гевгелија, плаќате 100 денари на наплатната кај Смоквица, а ако тргнете од Скопје кон Гевгелија, на истата наплатна повторно плаќате 100 денари. За жителите на Демир Капија тоа е нечесно и неправедно. Затоа сметаме дека треба да се наплаќа по поминат километар, што сериозно ќе ја намали цената – изјави Николоски.
Тој информира дека за изработката на законското решение ќе бидат вклучени експерти од Европската транспортна заедница, со цел да се искористат искуствата на понапредните европски држави. Како примери од регионот ги посочи Хрватска, каде што се подготвува примена на ваков систем, и Белград, каде што започнува неговата примена на обиколницата.
Николоски очекува законот да биде презентиран во текот на декември.
Првично, новиот начин на наплата би се применил на автопатот Кичево–Охрид, за кој министерот очекува целосно да биде пуштен во употреба во мај. Во наредните недели, според најавите, треба да биде пуштен и најтешкиот дел од трасата, со четири галерии, мостови, вијадукти и најдолгите тунели.
Планот е системот постепено да се прошири и на другите автопатски делници што се градат, меѓу кои Прилеп–Битола, Букојчани–Гостивар, Гостивар–Тетово и Кичево–Букојчани.

