Во јавните обвинителства недостигаат околу две третини од потребниот стручен кадар, што создава дополнителен товар за обвинителите и ја отежнува нивната работа. Ова го посочи шефицата на Основното јавно обвинителство за гонење организиран криминал и корупција, Искра Хаџи Василева, во интервју за „360 степени“.
„Ако отприлика, грубо земено, некоја третина недостасува кадар како обвинители, недостасува двојно повеќе кадар како стручна служба – околу две третини“, изјави Хаџи Василева.
Таа нагласи дека особено се потребни финансиски експерти кои ќе помогнат во паралелното водење на криминалистичките и финансиските истраги.
Според неа, и ангажирањето на пет експерти од планираните десет би донело брзи и видливи резултати во работата на обвинителството.
„Да почнеме и со пола од таа бројка, јас сум убедена дека и тоа како ќе влијае на веднаш видлив резултат“, посочи Хаџи Василева.
Дополнително, таа укажа на потребата од финансиски истражители и форензичари специјализирани за компјутерски криминал, како и од зголемување на буџетските средства и кадровските капацитети.
Во интервјуто се осврна и на платите на обвинителите, посочувајќи дека доцнењето на одлуката на Уставниот суд за нивните коефициенти создава чувство на неправда и нееднаков третман во однос на судиите.

