Новоизбраната раководителка на Основното јавно обвинителство за гонење организиран криминал и корупција, Искра Хаџи Василева, денеска и официјално стапува на функцијата, со примопредавање на должноста од досегашниот шеф Ислам Абази.
Примопредавањето ќе се одржи во просториите на ОЈО ГОКК, по што е предвидена и средба на јавниот обвинител Ненад Савески со Хаџи Василева и Абази, информираат од Јавното обвинителство.
Хаџи Василева беше избрана за нова раководителка на обвинителството на 28 октомври, кога доби поддршка од 64 обвинители, од вкупно 171 важечко гласачко ливче. Во трката за функцијата учествуваа и обвинителите Фатон Азизи, Трајче Пеливанов, Лидија Раичевиќ и Јован Цветановски.
По изборот и давањето свечена изјава пред Советот на јавните обвинители, таа најави дека во фокусот на нејзината работа ќе бидат поефикасниот кривичен прогон, подобрата организација на обвинителството и поцелосното искористување на расположливите ресурси.
Како приоритети ги посочи и зајакнувањето на постојните капацитети, како и обезбедувањето дополнителни ресурси за поефикасна борба против организираниот криминал и корупцијата.
На функцијата доаѓа по истекот на мандатот на Ислам Абази, кој раководеше со ОЈО ГОКК од октомври 2022 година.

