На собраниската Комисија за финансирање и буџет денеска продолжува расправата за предлог-буџетот за 2027 година, кој се разгледува во второ читање. За документот се поднесени над 300 амандмани, а комисиската расправа е предвидено да трае вкупно 10 дена.
Министерката за финансии Гордана Димитриеска-Кочоска, при презентацијата на буџетот, истакна дека неговата цел е да обезбеди економски раст, фискална стабилност и подобрување на јавните услуги.
Според проекциите, во 2027 година се очекува раст на БДП од 3,8 проценти, додека вкупните буџетски приходи се планирани на 395,4 милијарди денари, а расходите на 440,4 милијарди денари.
Буџетскиот дефицит е проектиран на 45 милијарди денари, односно 3,5 проценти од БДП. За капитални инвестиции се предвидени 40,8 милијарди денари.
Од Министерството за финансии посочуваат дека приоритет ќе бидат развојните инвестиции, инфраструктурата, енергетиката, здравството, образованието и земјоделството.
Во меѓувреме, јавниот долг на крајот на септември изнесувал 56,6 проценти од БДП, а државата во 2027 година ќе треба да сервисира долгови во износ од 124,6 милијарди денари.
Расправа за предлог-буџетот продолжува со разгледување на поднесените амандмани.

