Поранешниот министер за правда, Игор Филков, истакна дека Извештајот на Европската комисија за 2026 година претставува јасна потврда дека политиките и реформите што ЗНАМ ги спроведувал во Министерството за правда во изминатите две години биле исправни и донеле видливи резултати.
Според Филков, она што за претходниците биле само ветувања, за нив претставувало обврска која е преточена во конкретни законски решенија. Тој нагласи дека особено значајна е позитивната оценка во Извештајот за новиот Закон за Судскиот совет, донесен во декември 2025 година, со кој се адресирани препораките на Венецијанската комисија и Оценската мисија, подобрувајќи ја транспарентноста и јасноста при изборот на судии и водењето дисциплински постапки.
Позитивни оценети се и новиот Закон за Советот на јавните обвинители од 2026 година, како и новиот Закон за парничната постапка, со кој по повеќе од 20-годишен застој се модернизираат и забрзуваат граѓанските судски постапки, исполнувајќи ги препораките од претходниот извештај на ЕК.
„Во реализацијата на активностите планирани за Развојната секторска стратегија за реформа на правосудството 2024–2028 бележиме значителен пораст – од 42,9% за 2024 година, на 56,9% за 2025 година. Препознаен е и напредокот во подготовката на Патоказот за владеење на правото, како и потпишувањето на Рамковната конвенција на Советот на Европа за вештачка интелигенција во мај 2026 година“, истакна поранешниот министер Филков.
Осврнувајќи се на критиките во Извештајот кои се однесуваат на борбата против корупцијата, финансиските и човечките ресурси, како и ефикасноста на правосудните институции, тој појасни дека антикорупцијата се следи како хоризонтален процес кој влијае на сите кластери и поглавја, а предизвиците бараат ангажман од сите надлежни институции.
Филков потсети дека во текот на неговиот двегодишен мандат, тимот во Министерството за правда подготвил вкупно 33 закони – 5 веќе се донесени, 2 се во собраниска процедура, 10 во владина, а останатите се на ЕНЕР или се финализирани. Меѓу нив се и законите за спречување корупција и судир на интереси, за јавно обвинителство, за судски буџет, за судови, за кривична постапка, како и новиот Кривичен законик.
На крајот, тој порача дека поставени се важни темели за независно и ефикасно судство, но за целосно завршување на реформите неопходно е задржување на континуитетот и активно вклучување на сите чинители, при што ЗНАМ останува доследен на владеењето на правото како внатрешен коректив на Владата.